A empresa Transportes Souto anuncia a "inminente" presentación do concurso e pide desculpas a empregados e provedores

A empresa Transporte Souto anunciou "a inminente presentación do concurso de acredores" a través dun anuncio publicado este sábado en prensa, no que pide "desculpas a todos os afectados, especialmente empregados e provedores".

No anuncio, a compañía, que en días pasados entrou en preconcurso, explica que tentou a entrada dun fondo de investimento pero "desestimouse" debido ao "imposible cumprimento" dos requisitos.

Tamén "se tentou expor un plan de viabilidade", pero "non foi posible alcanzar unha formulación que resultase realizable", segundo apunta.

A súa situación explícaa pola redución de circulante e a baixada de facturación no exercicio 2017, que lle impiden afrontar, di, o seu "compromiso con empregados e provedores".

A iso, segundo engade, "sumouse o feito de que o pasado mes de setembro o principal cliente de Transportes Souto, que supuña a principal fonte xeradora de tesouraría para a empresa, decidiu rescindir o contrato, o que veu agravar unha situación xa complicada de seu".

Asegura que a familia propietaria do grupo "achegou todo o seu patrimonio persoal, durante este último ano, como veu facendo sempre que foi necesario, vendendo propiedades e avalando as operacións que a empresa formalizaba coas distintas entidades financeiras".

"Ante a gravidade da situación, e como un exercicio de responsabilidade coa cidade de Vigo e coa estabilidade económica da zona, a familia propietaria de Transportes Souto puxo en mans dos seus provedores a pasada semana, de forma temporal, os servizos que viñan prestando á fábrica de PSA, o seu actual principal cliente, conscientes dos problemas que suporía a paralización da actividade da mesma", segundo sinala o comunicado.

ACUSACIÓNS E DENUNCIAS "FALSAS"

Por outra banda, rexeita por "absolutamente falsas" as acusacións ao redor de "un hipotético alzamento de bens", así como as denuncias de desviación de facturación. "A empresa tomará as accións legais que considere oportunas respecto diso", avanza.

A familia tamén se reserva o dereito de emprender accións legais contra "as persoas ou organizacións que están a exercer presións, ameazas de atentar contra a integridade física e acoso sobre distintos membros da mesma".

Transportes Souto asegura que "loitou até o final para facer viable a compañía e preservar os postos de traballo", e aclara que están afectadas todas as empresas do grupo: Transportes Martínez Souto, Transportes Gasteiz e Souto Ltda, ademais das sociedades vinculadas á familia Loxística Dama, Investimentos Muiños, Invergestión Muíños e Promocións Rovimar.