SANTIAGO DE COMPOSTELA | 24/02/2018 | Actualizada ás 14:44 por EUROPA PRESS
Gardas civís e policías marcharon este sábado en Ourense convocados pola asociación Jusapol (Justiza Salarial Policial) e cun respaldo "brutal" da cidadanía, que, segundo os seus cálculos, elevou até 4.000 as persoas que secundaron a manifestación.
Un dos portavoces de Jusapol en Ourense, Manuel Fernández, subliñou que a "única reivindicación" desta protesta, que segue ás xa celebradas en Santiago e A Coruña --e outras moitas fóra da comunidade-- é "a equiparación salarial con policías autonómicas".
A estas alturas, viu "máis preto" que o Goberno central atenda a súa demanda. "Porque a cidadanía está connosco", subliñou, e xa que "ninguén entende esa diferenza salarial e por que non a atenden de maneira inmediata". "O PP arríscase a que alguén lles pase pola dereita", apostilou.
Sen mostrarse seguro de se conseguirán a súa demanda "ao 100%", este portavoz avisou de que van "loitar por iso". Esta xornada marcharon desde a Subdelegación do Goberno en Ourense até a praza maior, pasando por rúas como o Paseo e Lamas Carbajal.
"Súper satisfeito da mobilización e sobre todo do apoio da cidadanía", Fernández valorou a participación de representantes políticos como o alcalde de Ourense, do Partido Popular, o portavoz municipal do PSOE, de Democracia Ourensá, Adiante e Cidadáns Galicia.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.