Por E.P. | SANTIAGO DE COMPOSTELA | 24/02/2018 | Actualizada ás 14:06
"Os que se foron, por favor, que volvan canto antes". É a mensaxe que lanza Alfonso Rueda aos sindicatos de xustiza, nun momento con funcionarios do sector en paro indefinido desde o pasado 7 de febreiro, parece máis enquistado que nunca e as posturas das partes cada vez máis distantes.
Nunha entrevista concedida a Europa Press, o tamén conselleiro de Presidencia, Administracións Públicas e Xustiza identificou a manifestación que este sábado percorreu as rúas de Santiago "cun instrumento de presión perfectamente admitido", sempre que predomine "o respecto", pero remarcou que a Xunta segue "sentada" na mesa de negociación.
"A Xunta segue na mesa e non imos chegar a un acordo se non nos sentamos. Somos perfectamente conscientes de que hai un conflito e queremos solucionalo canto antes", trasladou o vicepresidente, quen di que son os sindicatos os que se levantaron "con escusas", en alusión á esixencia dun cambio de interlocutor.
E é que o martes desta semana, o comité de folga no que están representados SPJ-USO, Alternativas na Xustiza- CUT, UXT, STAJ, CSIF, CIG e CC. OO., levantouse das negociacións e, tras cargar contra o director xeral de Función Pública, José María Barreiro, quen encabeza a delegación da Xunta xunto co seu homólogo en Xustiza, Juan José Martín, pediron outro interlocutor.
Os sindicatos chegaron a apuntar ao presidente da Xunta, Alberto Núñez Feijóo, pero sobre todo piden a implicación directa do propio Rueda, que ve "unha escusa" detrás desta demanda e mesmo un indicio de que os sindicatos poderían non ter o "mesmo grao de interese" en negociar que o Executivo autonómico.
"Eu díxenllo moitas veces, dirixo as negociacións na parte que me corresponde. Si, son o responsable de Xustiza e estou concernido coas persoas que están na mesa. Se o problema é ese, que os sindicatos non se preocupen, que o señor Rueda está directamente implicado", proclamou.
En todo caso, preguntado acerca de se a Xunta está disposta a tomar a iniciativa para retomar o diálogo, insistiu en que son os sindicatos "os que se levantaron". Dito isto, manifestou que a Xunta "xa tomou a iniciativa moitas veces", polo que volver facelo "non sería un problema". Iso si, avisou que non se poden permitir "os vetos". "Se se quere negociar negóciase, pero non vale a escusa de que 'non me gusta o interlocutor'", advertiu.
"UNHA SAÍDA TEN QUE HABER"
Na entrevista con Europa Press, preguntado acerca de ata cando pode un sistema xa de seu sobrecargado como o da xustiza galega aguantar unha folga indefinida, contestou que el traballa para que haxa "unha solución". "Unha saída ten que haber, non sei en que momento", esgrimiu, antes de recoñecer que, " sinceramente", nunca pensou que o paro puidese prolongarse tanto, xa que, ao seu entender, a Xunta puxo sobre a mesa "unha boa oferta", polo que estaba seguro de que habería acordo
Aínda que non quere falar de prazos e insiste en que os sindicatos "esaxeran" nos seus cálculos de xuízos suspendidos, máis de 7.000 ata o momento, segundo as cifras difundidas polo comité de folga, o vicepresidente admite que a xustiza é "un servizo esencial" e "cada día" que pase de paro traducirase "en máis prexuízos". "Ata onde se pode chegar? Non o sei", sinalou.
E incidiu en que máis que os números, hai que "pensar nas persoas". Como exemplo, aludiu ás testemuñas que teñen que ir a un xuízo e "perden o día" ou quen necesita facer trámites importantes e non poden facelo. Neste punto, apelou á "responsabilidade", tras suxerir que se está facendo "unha interpretación dos servizos mínimos" coa que non concorda.
"Os cidadáns son os reféns desta folga e quen a mantén non é a Xunta", constatou, antes de recoñecer que tamén hai "un prexuízo económico", en relación, por exemplo, a que non se realicen os trámites necesarios para comunicar á Seguridade Social un falecemento e que haxa pensións que se sigan cobrando.
"OS DESCONTOS VANSE APLICAR"
"O diñeiro en cuestión vaise recuperar, pero con máis dilación", proclamou o vicepresidente, quen, preguntado sobre as críticas dos sindicatos ao que a Administración vai 'recadar' cos descontos nas nóminas pola folga, respondeu que a lei "está para cumprila". "E os descontos vanse aplicar", aseverou.
"Pero se os sindicatos cren que a Administración está a recadar moito, é tan fácil como deixar a folga", manifestou, antes de recalcar que, se se suxire aos traballadores que se poderán "recuperar economicamente" a través de horas extra para axilizar o traballo aprazado, este "non é a formulación da Administración en ningún caso".
De feito, aínda que precisou que, para medir como se soluciona o "colapso" derivado da folga, é preciso ver "canto vai durar", que "atascos" se xeran e que hai que retomar, mostrouse convencido de que "se están producindo prexuízos que dificilmente se van a poder recuperar con horas extra".
"PRESIÓNS DOS PIQUETES"
Ao longo da entrevista, insistiu en pedir "responsabilidade" á hora de exercer os servizos mínimos e alertou de "presións" por parte dos piquetes sindicais que, ao seu modo de ver, van "moito máis alá do dereito á folga". Tras recalcar que a Xunta "non discute" este dereito, lamentou determinadas actitudes que, ao seu xuízo, din "moi pouco da calidade democrática" dalgúns representantes sindicais.
Rueda admitiu que "está a haber queixas" por parte dos cidadáns, pero rexeitou falar de "sancións". "Se proceden, terá que habelas. Pero non é o que me preocupa agora, o que me preocupa é que se presten os servizos que hai que prestar", dixo.
A PROPOSTA SEGUE SOBRE A MESA
Acerca de se, no caso de que se retomen as negociacións, hai posibilidades de mellorar a proposta da Xunta, Rueda reiterou que na maior parte das reivindicacións (consolidación de emprego, amortizacións e substitucións de compañeiros de rango superior) o Goberno accedeu "ao que queren os sindicatos".
En canto á "discriminación" nas baixas por incapacidade temporal, subliñou que se comprometeu co comité trasladar a Galicia as "condicións máis vantaxosas" que se acorden nas negociacións no ámbito estatal. O que parece inamovible é a proposta de subida do complemento autonómico, que a Xunta mantén entre 816 e 1.080 euros máis ao ano, segundo o corpo. "Representamos ao conxunto dos galegos que pagan impostos", alegou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.