En Marea advirte que Meirás "debe volver á cidadanía sen pagar un euro" e ve "unha trampa" no intento de venda

O portavoz de En Marea, Luís Villares, advertiu de que o Pazo de Meirás "debe volver ao conxunto da cidadanía sen pagar un euro", á vez que interpretou como "unha trampa" da familia Franco o intento de vendelo.

"O Pazo de Meirás ten que volver ao sitio de onde nunca tivo que saír, que é o conxunto do ámbito público", aseverou, en declaracións aos xornalistas antes de participar na manifestación de funcionarios xudiciais este sábado en Santiago.

Para Villares, "é unha trampa da propia familia desfacerse agora do pazo", e opina que, "na medida en que foi expoliado dunha forma inxusta, por unha rapina en plena Guerra Civil, agora debe volver ao conxunto da cidadanía sen pagar un euro".

"Xa o gozaron gratuitamente durante bastante tempo e non teñen dereito a lucrarse como unha venda de algo que non era seu", engadiu o líder da formación rupturista.

"A TEORÍA DO GLOBO SONDA SALTOU POLO AIRE"

De forma paralela, o grupo parlamentario de En Marea --cuxo portavoz é o propio Villares--, a través dun comunicado de prensa, instou á Xunta a "abandonar a pasividade e pasar á vía xudicial de inmediato" para "recuperar" para o patrimonio público o Pazo de Meirás.

Na nota, o grupo considera que "a teoría do globo sonda da Xunta de Galicia saltou polo aire co anuncio da venda do Pazo de Meirás nunha inmobiliaria".

"Unha vez que queda esgotada esa teoría, o grupo parlamentario de En Marea considera urxente que o Goberno galego mova ficha dunha vez por todas", subliña o comunicado, con declaracións do viceportavoz, Antón Sánchez.