A Xunta insiste en "non caer na trampa" da familia Franco sobre o Pazo de Meirás

O conselleiro de Cultura, Román Rodríguez, lembrou este venres que a familia Franco ten a obriga de comunicar á Xunta cando "exista un hipotético comprador" para o Pazo de Meirás e apostou por "non caer na trampa" para que "Galicia desembolse recursos" por este ben.

Logo de saberse que o Pazo de Meirás apareceu á venda por oito millóns de euros no sitio web da inmobiliaria cántabra Mikeli, Rodríguez lembrou que "non é a primeira vez que hai este tipo de anuncios", tras o que instou a manter a calma, dado que "ten que haber alguén que o compre" para que se produza esta "hipotética" venda.

A familia propietaria, os Franco, teñen "a obriga de, cando teñan un hipotético comprador, comunicarllo á Xunta, que ten a posibilidade de exercer o dereito de tenteo", isto é, a compra preferente polo mesmo prezo.

No entanto, o conselleiro reiterou que a Administración galega descarta esta opción, dado que hai un "mandato parlamentario" que "reflicte a vontade dos galegos" de que este Ben de Interese Cultural "pase a ser propiedade pública sen desembolsar ningún recurso económico".

"Non imos exercer o dereito de retracto, pero si imos pelexar desde o punto de vista xurídico e legal para que este ben pase a patrimonio público", sentenciou Román Rodríguez, que reiterou que a Xunta "non vai transferir nin un só euro aos propietarios actuais".

Tras lembrar que un "hipotético comprador" debe "saber que este ben ten moitas limitacións en canto ao seu uso", o conselleiro apostou por "non caer na trampa nin en hipotéticas estratexias encamiñadas a que Galicia desembolse recursos" por este monumento.