Concentración para apoiar a unha xornalista da CRTVG que denunciou manipulación informativa

A Central Unitaria de Traballadores (CUT) convocou unha concentración este martes ás dez da mañá nos xulgados do social de Fontiñas en Compostela en solidariedade coa xornalista Ana B. Costoia Viqueira. A traballadora da Radio Galega, que denunciou prácticas de manipulación informativa, foi supostamente desacreditada por Alfonso Sánchez Izquierdo, director xeral da CRTVG, nunha comisión de control no Parlamento.

O director xeral da CRTVG, Alfonso Sánchez Izquierdo, no Parlamento. | Fonte: EP

O pasado 6 de setembro, a xornalista elaborou unha nova sobre a desarticulación dunha célula terrorista en Marrocos e Sevilla, pero no momento de locutar a noticia en directo dentro do estudo, unha responsable do programa ordenoulle omitir a información sobre a anterior afiliación ao PP de Melilla do presunto líder da célula xihadista.

Trala denuncia de manipulación informativa que a traballadora fixo ante o comité de empresa da CRTVG, o director xeral do medio público, Alfonso Sánchez Izquierdo, tería tentado, segundo a CUT, "desacreditar profesional e persoalmente" á traballadora en resposta ás preguntas de distintos grupos parlamentarios durante a Comisión de Control da CRTVG, “nun acto de represalia que vulnera dereitos fundamentais da xornalista, que se ve obrigada a acudir agora aos xulgados na procura do restablecemento da súa honra”.

A CUT convoca esta concentración en apoio á traballadora o día da  celebración do xuízo -no que está citado para comparecer o director xeral da CRTVG- e para esixir novamente a creación do Consello de Informativos e a posta en marcha do Estatuto Profesional, ferramentas contra a manipulación informativa que obriga a crear desde o ano 2011 a Lei reguladora dos medios públicos pero que, segundo o sindicato, o Goberno galego e a dirección da CRTVG non teñen interese algún por habilitar.