Un deputado do PP a traballadoras obrigadas a desprazarse 50 km: “Seguen indo á mesma igrexa, misa e enterros”
CCOO pide xa a renuncia do deputado popular Carlos López Crespo por “amosarse máis preocupado” por defender o Grupo Calvo que “a unhas traballadoras e a unha localidade como Esteiro”.
Por Galicia Confidencial | Compostela | 05/12/2017 | Actualizada ás 13:35
“Seguen indo comprar ao mesmo supermercado e mesmo van á mesma igrexa, á misa ou aos enterros”. Deste xeito despachou o parlamentario do PPdeG Carlos López Crespo o traslado forzoso de varias traballadoras do Grupo Calvo en Esteiro a outra planta que a conserveira ten en Carballo, o que implica moverse máis de 50 quilómetros.
Unhas declaracións polas que Comisións Obreiras (CCOO) pediu xa a renuncia deste deputado “por inxuriar o sindicato e faltarlles ao respecto ás traballadoras”. De feito, o secretario xeral da central sindical, Ramón Sarmiento, rexistrou xa no Parlamento un escrito no que pide unha xuntanza co presidente da Cámara autonómica e esixe as desculpas de López Crespo.
Foi este luns, 4 de decembro, cando no marco da discusión dunha inicitiva na Cámara, o parlamentario popular acusou a CCOO de mentir en relación co peche da planta que a conserveira posúe en Esteiro e o traslado do persoal a Carballo. “O deputado tamén lles faltou ao respecto ás traballadoras pois tentou minimizar un traslado forzoso a máis de 50 quilómetros aducindo que as traballadoras seguen indo comprar ao mesmo supermercado ou incluso van á mesma igrexa, á misa ou aos enterros”, indicou o sindicato.
Por iso, considera “indignante” que un “representante do pobo” se amose máis preocupado por defender un grupo empresarial que o ano pasado facturou máis de sesenta millóns de euros que a uns traballadores e a unha localidade “xa moi castigada” como é Esteiro. “Tamén é vergoñento que para defender as súas teses intente inxuriar unha das principais organizacións sociais do país e, peor aínda, que o faga faltándolles ao respecto ás persoas afectadas por unha decisión empresarial”, dixo.
CONFLITO LABORAL EN ESTEIRO
O pasado venres, día 1 de decembro, comezou o período de consultas entre a empresa e a parte social respecto do futuro da planta de Esteiro. Hai convocadas dúas novas xuntanzas, a derradeira delas o vindeiro 14 de decembro. Nese momento rematará o período de consultas e a empresa comunicará a súa decisión final.
CCOO defende que calquera acordo que se produza durante este período de consultas sexa sometido á votación de todo o persoal en asemblea, observación que a empresa rexeitou polo momento.
