A produción industrial crece un 6,1% en Galicia en outubro

A produción industrial subiu un 6,1% en outubro en Galicia en comparación co mesmo mes de 2016, o décimo maior incremento do país, que de media o fixo un 6,9%, segundo informou este martes o Instituto Nacional de Estatística (INE).

En xeral, a produción industrial aumentou o pasado mes de outubro en todas as comunidades, salvo en Castela e León, que se situou con taxa negativa, ao rexistrar unha caída do 1,8%.

Con todo, no acumulado de xaneiro a outubro deste ano, Galicia sitúase como a décima comunidade con aumento da produción industrial, ao rexistrar unha alza do 1%, de forma que só Canarias, cunha subida do 0,4%, queda por detrás. O incremento medio foi do 2,3%.

No entanto, nos dez primeiros meses do ano hai tres comunidades autónomas onde a produción industrial decrece, que son Castela e León, cunha caída do 6%; A Rioxa, cun descenso do 5,7% e Navarra, cun retroceso do 0,4%.

DATOS NACIONAIS

En España, o Índice Xeral de Produción Industrial (IPI) aumentou un 6,9% en outubro en relación ao mesmo mes de 2016, taxa 6,7 puntos superior á do mes de setembro e o seu terceiro mellor dato do ano após o de xaneiro e marzo.

Co avance interanual de outubro, a produción industrial encadea seis meses consecutivos de incrementos en España.