Amigos da Ópera de Santiago reúne en escea a Cándido Pazó e o Taller Atlántico Contemporáneo

A asociación de Amigos da Ópera de Santiago de Compostela estreará o próximo 16 de decembro ás 20,00 horas no Teatro Principal a súa segunda produción operística: 'Il segreto di Susanna'.

A montaxe reunirá en escena ao Taller Atlántico Contemporáneo, ao actor e dramaturgo Cándido Pazó, á soprano moldava Clara Jelihovschi Panas e ao barítono Javier Franco.

A peza conta co patrocinio da Consellería de Cultura, Educación e Ordenación Universitaria e a Deputación da Coruña, e coa colaboración do Concello de Santiago e a Universidade de Santiago.

As entradas xa están á venda e pódense adquirir a 10 euros a través da billetera do propio teatro ou mediante a web de entradas de Abanca.

Deste xeito, Amigos da Ópera de Santiago dálle continuidade á liña de produción que abriu o ano pasado coa ópera 'Brundibar' e que continúa neste 2017 con 'Il segreto di Susanna', peza cuxo libreto pertence a Enrico Golisciani, mentres que a música está composta por Ermanno Wolf-Ferrari.

Volve confiar a dirección artística a Cándido Pazó, quen, ademais de interpretar un dos papeis da obra, traballará con dúas dos seus colaboradores habituais no ámbito escénico: o escenógrafo Carlos Alonso e o iluminador Afonso Castro.

O apartado musical correrá a cargo do Taller Atlántico Contemporáneo, que, baixo a dirección musical de Diego García, encargarase da música que acompañará as voces dos citados Javier Franco e Clara Jelilohvschi Panas.

Os intérpretes que conforman o Taller para esta produción son James Dahlgren (violín), Nazaret Canosa (violín), Ioana Ciobotaru (viola), Millán Abeledo (violoncello), Alfonso Morán (contrabaixo) e Nicasio Gradaílle (piano).

'Il segreto di Susanna' é unha ópera cómica nun acto. Un 'tour de force' dun pequeno secreto que vai crecendo á vez que a inseguridade e a desconfianza de Gil, o marido de Susana; un matrimonio novo que reside no noroeste italiano de Piamonte.

A moza omitió comentarlle ao seu recente esposo que tiña o hábito de fumar ás agachadas. Gil, pola súa banda, decátase do cheiro e pensa que a súa esposa lle é infiel. Inquieto, trata de pescala 'in fraganti' desenvolvendo case unha escena de vodevil na que o seu mordomo, Sante, cómplice de Susana, xogará un papel fundamental. A peza, por tanto, xira ao redor da intimidade, os segredos, o vicio e os celos, aínda que abordados de maneira inxenua e sinxela.