Os familiares do batería de Los Piratas recorrerán a sentenza que absolve ó garda civil que lle disparou

Os avogados de familiares de Javier Fernández, que foi batería da banda viguesa de rock Los Piratas, prevén recorrer a sentenza do Xulgado do Penal número dous de Pontevedra, que absolveu do delito de homicidio imprudente ao axente da Garda Civil, de iniciais R.L.A., que en agosto de 2015 disparou e causou a morte ao músico.

Segundo o avogado da muller e do fillo do falecido, Gerardo Gayoso, "todas as acusacións van recorrer" ao entender que a valoración do xuíz é "errónea", xa que a proba practicada no xuízo "pode levar a unha conclusión totalmente diferente" e resolver que a actuación do axente foi "desproporcionada".

En relación con iso, remarcou que no propio fallo "se recolle e dá por probado que o axente sabía que (o músico) estaba enfermo", e dita enfermidade produciulle a "agresividade" que derivou en que causase lesións ao segundo axente cun tenedor. "O xuíz xustifica a actuación do garda civil, e nós dicimos que é desproporcionada porque estaba enfermo", selou.

A colación, insistiu en que Javier Fernández "non era un delincuente, nin portaba armas nin tiña intención de matar a ninguén". Pola contra, incidiu en que "na proba practicada queda claro que era unha persona enferma e que non era necesaria a súa morte".

A avogada dos pais do falecido, María Jesús Sarabia, confirmou que, aínda que ten que valorar as opcións cos seus clientes, "moi probablemente" recorrerán esta sentenza, posto que non aproban "os argumentos utilizados polo xuíz para absolver" ao axente e consideran que hai "elementos que non se tiveron en conta".

Contra a sentenza pódese presentar un recurso de apelación ante a Audiencia Provincial de Pontevedra no prazo de 10 días desde a súa notificación, un tempo que, dixo Gayoso, se pode prolongar "un pouco máis" porque van pedir as gravacións do xuízo, pero que, segundo engadiu Sarabia, utilizarán para fundamentar o seu recurso "no que se viu e escoitou" no xulgado.

SENTENZA ABSOLUTORIA

Na sentenza, o xuíz declara probado que o 26 de agosto de 2015 o axente R.L.A. e outro compañeiro, acudiron á vivenda que o músico compartía coa súa muller e o seu bebé en Ponteareas para impedir unha suposta agresión doméstica. Unha vez alí, atoparon a Javier Fernández, que "estaba cada vez máis agresivo" e comezou a dicir que os ía "matar a todos".

Nun momento dado, o músico fíxose cun coitelo e un tenedor --engade-- e empezou a agredir a un axente, polo que o segundo garda civil, "consciente da situación de risco do seu compañeiro, sacou a pistola" e "rapidamente, cando considerou que podía facer un disparo coa finalidade de ferir (a Javier Fernández), disparoulle para impedir que continuase agredindo o seu compañeiro".

O maxistrado ve acreditada "a necesidade do medio empregado e ademais, dadas as circunstancias, a súa proporcionalidade", e resolve que "a conduta do señor R.L.A. estaba totalmente xustificada e non foi contraria a dereito, o que, ademais, exclúe a existencia dun delito doloso de lesións".

As tres acusacións particulares --exercidas pola viúva, o irmán e os pais do músico-- pedían catro anos de prisión e seis de inhabilitación para o axente, mentres que a Fiscalía e o avogado do Estado sostiñan que este desenfundou a súa arma regulamentaria para defenderse da actitude agresiva da vítima, polo que entendían que non procedía "pena algunha".