Máis de 30 concellos súmanse á Xunta creada a favor da devolución do Pazo de Meirás
Deciden explorar todas as vías para a recuperación do edificio.
Por E.P. | A CORUÑA | 14/11/2017 | Actualizada ás 19:32
Máis de 30 concellos, na súa maioría da provincia da Coruña, pero tamén os de Foz (Lugo), Viana do Bolo (Ourense) e Pontevedra —ademais da Deputación desta provincia—, sumáronse á Xunta creada a favor da Devolución do Pazo de Meirás que este martes celebrou o seu primeiro plenario na Deputación da Coruña, segundo informa o organismo provincial.
Sobre o contido da reunión, esta institución sinala que se acordou "afondar en todas as vías posibles encamiñadas á devolución do Pazo de Meirás, nestes momentos en mans da familia Franco".
Ademais das que formaron parte do grupo promotor, na reunión participaron representantes dos máis de 30 concellos e quince asociacións e entidades que se sumaron formalmente á moción de adhesión a esta Xunta a favor da Devolución do Pazo de Meirás.
PATRIMONIO PÚBLICO
Na reunión, os dous responsables das investigacións histórica e xurídicas sobre o Pazo, Emilio Grandío e Xavier Ferreira, presentaron o estado no que se atopan os informes cos que se espera abrir "vías sólidas para iniciar o proceso de integración do Pazo de Meirás no patrimonio público".
Respecto desta cuestión, o profesor da Facultade de Dereito da Universidade de Santiago (USC), Xavier Ferreira, apuntou a necesidade de "operar cambios lexislativos que eviten consagrar procesos de adquisicións de bens en situacións históricas de golpe de estado".
