Un ano de prisión e 1.060 euros de multa para o home que estampou un ovo contra un edil de Ourense

A Audiencia Provincial de Ourense condenou a un ano de prisión e a unha multa de seis meses, a razón de seis euros ao día, ao home acusado de estampar un ovo contra o concelleiro ourensán Gonzalo Pérez Jácome en abril de 2015, por consideralo responsable dun delito de atentado e dun delito leve de lesións.

O acusado deberá pagar a Pérez Jácome 360 euros polos días de impedimento, así como 700 euros polas secuelas do golpe, segundo reflíctese na sentenza, recollida por Europa Press.

A sentenza feita pública este xoves confirma, ademais, o delito de atentado contra a autoridade por considerar acreditada a agresión por mor da declaración da vítima, "persistente no tempo", das testemuñas e polo parte médico emitido tras a agresión.

Nesta liña, o tribunal sinala que a defensa do acusado non cuestionou en ningún momento a agresión, feito que foi asumido polo agresor "aínda que minimizado" a un simple lanzamento dun ovo durante a súa declaración como imputado.

A defensa apuntou que o agresor descoñecía que Pérez Jácome era concelleiro no Concello de Ourense, porque é natural de Oia (Pontevedra).

Con todo, o fallo rexeita esta posibilidade e apunta que o condenado coñecía o cargo do agredido tal e como evidencias as súas propias declaracións ao referir que a agresión respondeu a que "non estaba de acordo" coa postura adoptada por Pérez Jácome en relación coa banda de música "coa que colaboraba".

LESIÓNS

O texto tamén apunta á existencia dun delito leve de lesións pola intención de "menoscabar a integridade física ou moral" da vítima, ao considerar que o acusado "golpeou a cara de Pérez Jácome" sen que fose preciso un tratamento médico.

A sentenza non é firme e contra ela cabe recurso de casación no cinco días seguintes á súa notificación.

Os FEITOS

Os feitos tiveron lugar o 10 de abril de 2015, cando o portavoz de Democracia Ourensá, Gonzalo Pérez Jácome, abandonou de forma temporal un pleno no que a súa formación reclamaba a supresión das axudas municipais á Banda de Música.

Na Praza Maior un home achegóuselle, deulle cun ovo na cara e fuxiu. Pérez Jácome perseguiu ao seu agresor por varias rúas e tras alcanzalo solicitou a axuda da Policía Local.

Durante o xuízo, ao que non acudiu ao acusado, Pérez Jácome relatou sentir "un lapote fuertísimo que lle deixou aparvado" e escoitar un "aí quédache iso para que aprendas".

Ao ver saír correndo ao seu agresor saíu na súa persecución "sen perdelo de vista en ningún momento". Relatou que cando o alcanzou "disimulou" dicíndolle que "non pasara nada" e que lle sinalou que ía chamar á súa nai para que non lle preparase a comida, aínda que en realidade chamou á Policía Local.