Historias de animais vítimas dos incendios
A vaga de lumes tamén deixou fondas feridas na fauna doméstica e salvaxe. GC recompila algunhas das historias destas outras vítimas. Asociacións e protectoras piden calma e aseguran que teñen a situación controlada.
Por Galicia Confidencial | Santiago de Compostela | 19/10/2017 | Actualizada ás 12:19
Cans, gatos, vacas, cabalos, xabaríns, raposos... Son moitas as especies de animais domésticos e salvaxes que tamén son vítimas da vaga de incendios que arrasou arredor de 35.500 hectáreas en Galicia esta semana.
A foto tomada por Salvador Sas (EFE) en Chandebrito (Nigrán) dunha cadela levando na boca o seu cachorro totalmente calcinado impactou nos corazóns de milleiros de persoas. Pero son máis os animais que, dun xeito ou outro, foron vítimas desta praga. Algúns perdidos e desorientados, outros queimados pero vivos, outros mortos...
Una muestra mas de la tragedia de los incendios en Galicia: La perrita que volvió en busca de su cachorro y no paró hasta encontrarlo, trayendo en la boca el cadáver de su cría calcinado tras el incendio forestal producido en la aldea de Chandebrito en Nigrán (Pontevedra) pic.twitter.com/NZSr0ez37g
— Carla Antonelli (@CarlaAntonelli) 18 outubro 2017
Protectoras de animais, centros veterinarios e asociacións e entidades animalistas recibiron estes días unha avalancha de solidariedade en xeito de axuda material e humana para recoller e coidar os animais afectados. Con todo, todas elas lanzaron unha mensaxe de "calma" xa que, dixeron, a situación estivo "controlada".
O centro veterinario equino Casal do Río referendou que hai grande interese en colaborar e recibiu un alto número de doazóns de material e medicación; aínda que, apuntou que "a situación está mais que controlada" e "non existe tanto risco como o que manifestan as redes sociais". "Toda axuda é importante, a calma fundamental e a organización do material moi importante", selou.
Pola súa banda, a Asociación Protectora de Animais Os Biosbardos, en Ponteareas, coincidiu en que acudiu "moitísima xente a axudar" desde o domingo, cando "por prevención" se fixo un chamamento para desaloxar esta e outras protectoras próximas aos incendios. "Foi espectacular", trasladou unha portavoz dos Biosbardos.
Malia que os animais foron desaloxados e acollidos por numerosas familias, varios deles atópanse perdidos; no caso desta protectora de Ponteareas catro cans —un deles localizado no Monte do Galiñeiro e outro en Lavadores—. No caso de que sexan atopados, recalcou que "é básico non asustalos máis, porque se poden ir da zona" onde están.
Co obxectivo de localizar a estes animais, así como a outros que poidan atoparse feridos ou perdidos, centos de persoas están a organizarse en grupos para facer batidas polos montes incendiados para tratar de dar con eles e auxiliarlles. "Todas as axudas son ben recibidas", selou Os Biosbardos.
Pola súa parte, Adega, a Asociación para a Defensa Ecolóxica de Galiza, considera importante dar unha "oportunidade á fauna salvaxe" tralos incendios, polo que pediron suspender temporalmente a caza non só nas zonas queimadas senón tamén no seu perímetro, xa que esta "tende a refuxiarse nestas áreas", e solicita tamén dispoñer alimento de urxencia para o gando.
Estas son algunhas desas historias de animais que tamén sufriron fisica e emocionalmente o impacto dos lumes.
