En Marea, PSdeG e BNG piden un pleno extraordinario "urxente" para que Feijóo compareza polos incendios

Os grupos de En Marea, PSdeG e do BNG rexistraron un escrito, a través dos seus portavoces, no que piden á Mesa do Parlamento a convocatoria "urxente" dun pleno extraordinario no que compareza o presidente galego, Alberto Núñez Feijóo, para "analizar a gravísima situación" creada "polos incendios forestais e urbanos que asedian o país".

O tres grupos rexistraron na tarde deste mércores un escrito neste sentido ao amparo do regulamento da Cámara e que asinan os portavoces da oposición: Luís Villares (En Marea), Xoaquín Fernández Leiceaga (PSdeG) e Ana Pontón (BNG).

Este paso vén precedido dunha sesión de control tensa durante a que o presidente, Alberto Núñez Feijóo, anunciou a súa intención de comparecer na Cámara para dar explicacións sobre o ocorrido aínda que non concretou a data na que pretendía facelo e subliñou que determinalo corresponde ao Parlamento.

Este martes compareceu a conselleira de Medio Rural, Ángeles Vázquez, no pleno ordinario, pero toda a oposición coincide en que é o presidente o que debe dar explicacións.

Niso incidiron xa na Xunta de Portavoces previa na que se comunicou que se alteraría a orde do día inicialmente previsto para o pleno desta semana co fin de que puidese comparecer Ángeles Vázquez, pero o PP opúxose e, na votación do día seguinte, ratificouse a alteración para que comparecese a conselleira.