O Breogán, tres de tres
O Cafés Candelas lucense vence 73-86 a Lleida tras sentenciar o choque no último cuarto cun parcial de 0-13, sendo decisivas dúas triplas consecutivas de Sergi Quintela. Aprazado o derbi COB-Básquet Coruña pola rotura dunha canastra.
Por gcdeportes | Lugo | 16/10/2017 | Actualizada ás 01:53
Ficha técnica
Força Lleida 73: Jarred (17), Sutina (5), Dukanovic (14), Marc Martí (8), Papa Mbaye (7) –cinco inicial- Albert Lafuente (4), Hermet (8), Rubin de Celis (0), Miguel Feliu (10) e Stankevits (0).
CB Breogán 86: Christian Díaz (9), Salva Arco (13), Lofberg (19), Demetrio (14), Guille Rubio (4) –cinco inicial- Matt Stainbrook (15), Ricardo Uriz (2), Sulejmanovic (0), Cigoja (0) e Sergio Quintela (10).
Parciais: 25-17, 17-20 (42-37), 17-21, 14-28 (73-86).
Árbitros: Francisco Zafra e José Vázquez García. Sen eliminados
Incidencias: partido da 4ª xornada da LEB Ouro no pavillón Barris Nord de Lleida.
Cun parcial de 0-13 no último cuarto e 10 puntos decisivos de Sergi Quintela, o Breogán venceu 73-86 a Lleida e conserva a súa condición de invicto tras tres partidos nos que suma tres vitorias. Johan Löfberg foi o mellor dos lucenses con 19 puntos e 9 rebotes, ben secundado por Matt Stainbrook, 15 puntos e 9 rebotes, e Salva Arco, 13 puntos. Os lucenses non tiveron un bo día no tiro exterior (7/21 en triplas), pero anotou tres decisivas con 67-67 no marcador, dúas de Sergi Quintela e outra de Christian Díaz. Breogán é, xunto con Melilla, o único equipo da LEB Ouro que aínda non coñece a derrota.
Os lucenses saíron enchufados e cos puntos de Lofberg e Salva Arco abriron oco (4-13), pero Lleida parou o encontro, Breogán foise do partido e os cataláns acadaron un parcial de 21-4 para rematar o primeiro cuarto con 25-17. Lleida acadou a máxima diferenza (28-19, 33-24) a base de triplas, pero Breogán reaccionou con defensa e cos puntos do capitán Arco para achegarse 39-37. No tempo de lecer, 42-37.
Lleida seguía anotando dende 6,75 (acabou con 12/22 e un 55% de acerto), pero Breogán empatou o partido (53-53) cos puntos de Lofberg e Demetrio e un parcial de 1-10. Feliu anotou outras dúas triplas e contestou Demetrio: 59-58 con dez minutos por disputar. Tras un intercambio de canastras, e con 67-67 no marcador, parcial lucense de 0-13 con triplas de Sergi Quintela (dúas consecutivas) e Christian Díaz, e Breogán púxose 67-80. Brano Dukanovic sumou dúas xogadas de tres (73-80), pero Quintela anotou tras rebote e sentenciou o choque. Ao final, 73-86 e terceira vitoria en tres partidos.
