O primeiro derbi, para Breogán
O Cafés Candelas lucense, con 13 triplas e case un 50% de acerto, vence 83-71 no Pazo a Río Ourense Termal e suma a primeira vitoria no arrinque da LEB Ouro.
Por gcdeportes | Lugo | 30/09/2017 | Actualizada ás 23:30
Ficha técnica
Cafés Candelas Breogán 83: Ricardo Uriz (14), Salva Arco (13), Lofberg (16), Demetrio (8), Guille Rubio (6) –cinco inicial- Fuzaro (13), Christian Díaz (5), Cigoja (0), Sergi Quintela (8) e Matt Stainbrook (0).
Río Ourense Termal 71: Reggie Johnson (7), Rokas Uzas (17), Víctor Moreno (3), Héctor Manzano (2), Orlov (0) –cinco inicial- Trist (19), Ahonen (11), Verners Kohs (3), Martín Rodríguez (1) e Ndoye (8).
Parciais: 26-15, 21-18 (47-33), 16-21, 20-17 (83-71).
Árbitros: Juan González Cuervo e David Sánchez Benito. Sen eliminados.
Incidencias: primeira xornada da LEB Ouro no Pazo Provincial dos Deportes de Lugo.
O primeiro derbi, para o CB Breogán, máis rodado no arrinque da LEB Ouro, que demostrou a súa superioridade sobre un COB escaso de adestramentos. Agás os dous primeiros minutos, sempre estiveron por diante os de Natxo Lezcano. Abriron oco con catro triplas no primeiro cuarto (26-15), acadou a máxima vantaxe (+18) no segundo cuarto, diferenza que repetiu no último, para acabar gañando por 83-71. Os lucenses tiveron case un 50% de acerto nas triplas (13/27), por un escaso 6/21 dos ourensáns.
Rokas Uzas anotou cinco puntos no inicio, pero as triplas de Lofberg, Salva Arco e dúas de Ricardo Uriz abriron oco para o Breo e obrigou ao tempo morto de Gonzalo García, con 20-13 en seis minutos. Ao final do primeiro acto, 26-15 tras dúas canastras de Danilo Fuzaro. Cos puntos e as triplas de Sergi Quintela e Fuzaro, os lucenses acadaron a máxima vantaxe (42-24). Trist e Uzas mantiveron o COB, pero Lofberg anotou outra tripla antes do descanso: 47-33.
O terceiro cuarto foi o mellor do COB. Uzas achegou os seus a cinco con dúas triplas (52-47), pero Salva Arco respostou con outras dúas (57-47). Aínda así, Ourense chegou por debaixo dos dez ao cuarto decisivo (63-54). De novo as triplas serviron aos lucenses para irse no marcador. Anotaron Christian Díaz, Sergi Quintela e Uriz (72-61). Ourense pediu dous tempos mortos para agarrarse ao partido, pero outra tripla de Ricardo Uriz (acabou con 4/7) sentenciou o choque (81-63). Ao final, 83-71, e os lucenses que suman a primeira vitoria da LEB Ouro 2017-18.
