O BNG alerta do interese das pasteiras lusas por “agudizar a ecualiptización” de Galicia
Os nacionalistas din que as intencións de Navigator Company de instalarse no país “é unha ameaza a esperanza de Galiza de optar por un monte racional”.
Por Galicia Confidencial | Compostela | 11/08/2017 | Actualizada ás 09:10
O interese da pasteira lusa Navigator Company de investir en Galicia para mercar plantacións de eucaliptos como medio de eludir as limitación para a plantación de eucalipto previstas no país veciño, tal e como informou GC, chegou xa ao terreo político. O BNG denuncia que esta situación “agudizaría a eucaliptización do monte galego”, que xa acumula 230.000 hectáreas máis das previstas no actual plan forestal da Xunta ata 2032.
“A nova regulación portuguesa para controlar e reducir o eucalipto é unha ameaza á esperanza de Galiza para optar por un monte racional, diversificado, multifuncional e sostible”, salienta o portavoz parlamentario de Agricultura, Xosé Luís Rivas, que ve no interese da pasteira lusa por aprovisionarse de eucalipto neste país “unha ameazada engadida que pode converter o noso monte nunha explotación económica propia do século XIX de tintes coloniais”.
“Non nós chegaba con soportar a ENCE, senón que agora pretende vir a portuguesa Navigator a chuchar no noso monte, como se fósemos unha colonia á explotar, mesmo cun custe ambiental tremendo para o noso territorio, para que fagan negocio dúas pasteiras a cambio de arrasar co noso monte”, denunciou Rivas.
"Ineptitude de Feijóo"
Nun comunicado, este deputado denuncia que “a plantación masiva e descontrolada de especies de pouca calidade nun monte de luxo, é un retrato da ineptitude do Goberno de Feijóo e da incapacidade do seu Goberno para sacar adiante un Plan forestal que dea alternativa racionais ao noso monte en beneficio dos e das galegas”.
Así, lembra que o resto do Estado e países europeos fixeron un proceso de repoboación maioritariamente con especies autóctonas. En Galiza só 300.000 dos 8,2 millóns de metros cúbicos que se cortan son de madeira de calidade procedente de especies autóctonas. Ademais, salientou a repercusión directa da invasión do eucalipto nun problema ambiental de primeira orde como son os incendios.
Neste sentido, e para afrontar esta situación, reclama un “plan para potenciar a transformación da madeira e xerar valor engadido e, polo tanto, máis ingresos económicos e máis emprego en Galiza”, beneficios fiscais para incentivar o coidado e ordenación do monte e impulsar un aproveitamento multifuncional do monte.
