Por GC Tendencias | Monforte de Lemos | 22/05/2017 | Actualizada ás 12:53
A Asociación Provincial de Empresarios de Hostalería e Turismo (APEHL), organizadora do Cume Tapas, elixiu este ano á actriz lucense Beatriz Serén para amadriñar o certame, que comezou o día 20 e rematará o vindeiro 4 de xuño.
Na presentación que conduciu a xornalista de Onda Cero Monforte, Manola Porto, ademais da madriña estiveron o alcalde de Monforte, José Tomé Roca; o xefe territorial de Presidencia da Xunta de Galicia en Lugo, José Manuel Rozas; o responsable da Área de Turismo da Deputación de Lugo, Eduardo Vidal, o presidente da APEHL, Cheché Real.
Beatriz Serén, coñecida entre outros traballos polo seu papel en Pazo de Familia da TVG, comprometeuse a facer unha escapada a Monforte para participar no concurso e coñecer mellor a Ribeira Sacra.
A tapa gañadora será elixida cos votos do público e un xurado profesional outorgará distincións ás mellores propostas nas categorías de tapa tradicional, tapa creativa e mellor maridaxe con viño da DO Ribeira Sacra. O devandito xurado está formado por catro expertos culinarios coordinados polo director técnico do concurso, Quique Rodríguez, e valorarán principalmente a presentación, a técnica, o sabor, o maridaxe co viño de DO Ribeira Sacra e, por suposto, o servizo e a atención ao cliente.
Como noutras edicións anteriores, varios establecementos hoteleiros de Chantada, Monforte de Lemos, Pantón, A Pobra do Brollón, O Saviñao e Sober ofrecerán tarifas especiais durante os días do concurso.
Entre o público participante sortearanse varios premios, entre eles unha viaxe a Milán e outra a Monçao.
Paralelamente á competición gastronómica, poñerase en marcha un concurso fotográfico a través da páxina do Cume Tapas en Facebook. As bases estarán publicadas na propia páxina e haberá premios para a mellor fotografía e o mellor álbum de fotos tomadas e publicadas nesta rede social durante o concurso.
Como novidade deste ano habilitouse unha aplicación móvil na plataforma web www.quedamosdetapas.com para poder facer un seguimento do concurso, consultar todas as tapas, os horarios e as direccións de cada local participante. A través dos códigos QR dos folletos pódese acceder a ela e descargala.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.