Por Galicia Confidencial | Compostela | 15/05/2017 | Actualizada ás 14:13
PuntoGal, o dominio galego en internet, celebra este ano o Día das Letras, dedicado a Carlos Casares, e o Día das Telecomunicacións e Internet coa posta en marcha dun servizo de intercambio de arquivos en colaboración co rexistrador galego Dinahosting.
No enderezo velaqui.gal, os usuarios poderán compartir de maneira sinxela e segura ficheiros de ata 2Gb de maneira gratuíta. Na páxina só hai que indicar quen envía e quen recibe, unha mensaxe para o destinatario e adxuntar o documento.
O sistema permite compartir ficheiros en múltiples formatos así como a subida de maneira simultánea de moitos documentos na mesma solicitude. O usuario pode limitar o número de descargas vinculadas a cada envío, cifrar cada solititude por medio dun contrasinal para incrementar a privacidade e enviar o documento ata a un máximo de vinte enderezos de correo electrónico. As ligazóns remitidas caducarán ós quince días, agás que o remitente dispoña unha data anterior para que deixe de estar dispoñible. Trátase un servizo similar que ofrecen outras multinacionais como WeTranfer, pero desenvolvido e localizado en Galicia.
Velaquí.gal forma parte dun convenio establecido entre PuntoGal e Dinahosting para o
desenvolvemento de novos servizos de valor engadido para os usuarios da internet galega. O
produto forma parte da filosofía do dominio de apostar polo desenvolvemento, dentro das súas
posibilidades, de accións de dinamización e crecemento da rede no país.
Rebaixas
Por outra banda, PuntoGal fará unha rebaixa no prezo dos dominios rexistrados. Nos rexistradores sumados a esta promoción, as persoas interesadas poderán obter o seu .gal por un prezo máximo de 17euros máis IVE. Os prezos rebaixados estarán vixentes dende o día 17 e ata o 31 de maio.
O rexistro, que cumpre agora tres anos dende a súa delegación, conta xa con máis de catro mil dominios rexistrados, entre os que figuran institucións, entidades sen ánimo de lucro, empresas e particulares. Para poder aproveitar a promoción, os interesados deben dirixirse ás empresas rexistradoras Dinahosting, Entorno Digital, Arsys, Host Europe, Openprovider e Ovh.com que ofrecen distintas políticas de prezos e servizos con rexistro de dominios novos dende 16,15€.
“Se ben a día de hoxe aínda non é posible igualar o prezo dun dominio .gal aos máis populares, a asociación fai esforzos coma esta promoción para que todas aquelas persoas e asociacións que queiran visibilizarse na rede como parte da comunidade galega, sigan a facelo”, apunta a entidade nun comunicado. A asociación amósase igualmente satisfeita de que as porcentaxes de renovación dos dominios sigan sendo moi altas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.