Non hai mellor cocido que o da androlla de Viana
Este domingo terá lugar a XLVII edición da Festa da Androlla de Viana, celebración gastronómica que exalta o embutido típico da zona e reúne a multitude de visitantes e participantes no desfile de fulións. Prevese servir até 2.400 xantares.
Por GC Tendencias | Viana do Bolo | 23/02/2017 | Actualizada ás 18:00
O fulión xa roxe e os boteiros andan a chimpos por Viana do Bolo, concello que se prepara estes días para multiplicar a súa poboación e a súa actividade económica co gallo do entroido. Segundo nos conta o alcalde, Secundino Fernández: “a poboación multiplícase estes días, os establecementos hostaleiros xa hai semanas que están cheos para esta fin de semana e toda esta afluencia trae consigo un forte impacto económico na hostalería, servizos e alimentación”.
Un dos eventos máis relevantes por traxectoria e por asistencia de xente ten lugar o “Domingo Gordo” (26 febreiro) día no que ten lugar o desfile dos diferentes fulións da comarca, os boteiros e as carrozas e o xantar de despois que este ano reunirá a uns 2.400 comensais. Segundo refire tamén o seu alcalde as entradas para a Festa da Androlla esgotáronse xa, en total vendéronse unhas 1.200 pero hai que sumar outros 1.100 comensais para os participantes no desfile, persoal da organización e convidados oficiais. Superáronse un ano máis as expectativas.
No programa deste ano, entre outras cousas, destaca a visita do programa da Televisión de Galicia “A Tarde” o xoves de comadres (23 de febreiro) entre as 16.00 e as 19.00 horas que emitirá o programa en directo dende a Casa da Cultura e o “Entroido Infantil” (luns 27) no que haberá a partires das 16.30 h. Fulión infantil, xogos tradicionais, música e chocolotada para os máis cativos . Para rematar a xornada, ás 20.00 horas, Fulión trapalleiro.
O martes de entroido ademais de desfile de Fulións con sesión vermú na Praza Maior xa é tradición a “Gran Fariñada” a partir das 16.00 horas e a queima dos lardeiros (lardeiro e lardeira) previa ao concurso de disfraces e baile fin de festa. O mércores rematan as celebracións pola tarde co enterro da sardiña, sardiñada popular e torrexas.
Como ben reza na saúda do alcalde: “Chegou o entroido. Chegaron os días da diversión, os días da transgresión, os días da carne, en definitiva chegaron os días nos que as vianesas e vianeses lles saen os séculos de historia que levan nos seus xenes”.
